न्यूज अभियान
हरेक खबर विशेष खबर

 रूपन्देही, २९ असोजः बालश्रम तथा जोखिममा रहेका बालबालिकाको क्षेत्रमा कार्यरत संस्था सिविन नेपालले आर्थिक अवस्था कमजोर भएका अपाङ्गता भएका बालबालिकाका परिवारलाई खाद्यान्न तथा दैनिक उपभोग्य सामग्री वितरण गरेको छ ।

    सिविन नेपालअन्तर्गत सञ्चालित बाल हेल्पलाइन, रुपन्देहीको बेन परियोजनामार्फत सिद्धार्थनगर नगरपालिकाका छ घरपरिवारलाई बुधबार खाद्यान्न तथा दैनिक उपभोग्य सामग्री सहयोग गरिएको हो । आर्थिक अभावका कारण दैनिक जीविकोपार्जन तथा खानपानको व्यवस्था गर्न पनि कठिनाइ भोगिरहेका परिवारलाई लक्षित गरी सहयोग गरिएको जनाइएको छ ।

    परियोजनामार्फत प्रतिपरिवार चामल, दाल, खानेतेल, नुन, मटर, चना, चिउरा र नुहाउने साबुन वितरण गरिएको थियो । आर्थिक अभावका कारण दैनिक आवश्यकता पूरा गर्न कठिनाइ भोगिरहेका अपाङ्गता भएका बालबालिका तथा उनीहरूका परिवारलाई खाद्यान्न सहयोगले दैनिक जीवनयापनमा राहत पुग्ने अपेक्षा गरिएको सिद्धार्थनगर नगरपालिकाका उपप्रमुख उमा अधिकारीले जानकारी दिनुभयो ।